ပေကျင်း၊ စက်တင်ဘာ ၇ ရက် (ဆင်ဟွာ)

“မြန်မြန်ရောက်လိုပါက တစ်ယောက်တည်းသွားပါ။ ဝေးဝေးရောက်လိုပါက အဖွဲ့နှင့်သွားပါ” ဟူသည့် အာဖရိကဆိုရိုးစကားပုံတစ်ခုရှိပါသည်။
တရုတ်နိုင်ငံနှင့် အာဖရိကတိုက်သည် ခေတ်မီအသွင်ပြောင်းမှုဆီသို့ လျှောက်လှမ်းရာတွင် တူညီသောစိတ်ထားရှိလျက် ၎င်းတို့၏ ဖွံ့ဖြိုးတိုးတက်မှုမဟာဗျူဟာများ ချိန်ညှိ၍ လက်တွေ့ကျသော ပူးပေါင်းဆောင်ရွက်မှုများကို တိုးမြှင့်ခြင်းက နှစ်ဘက်လုံးနှင့် ကမ္ဘာကြီးအတွက် ကျယ်ပြန့်သော အကျိုးကျေးဇူးများ ရရှိစေမည်ဖြစ်သည်။
တရုတ်နိုင်ငံ ပေကျင်းမြို့တွင် ကျင်းပသော ၂၀၂၄ ခုနှစ် တရုတ်-အာဖရိက ပူးပေါင်းဆောင်ရွက်မှုဖိုရမ် (FOCAC) ထိပ်သီးအစည်းအဝေးတွင် တရုတ်နိုင်ငံ သမ္မတ ရှီကျင့်ဖိန်က မိန့်ခွန်းပြောကြားခဲ့ရာ ငြိမ်းချမ်းရေးနှင့် လုံခြုံရေးဖြင့် မျှတ၊ ပွင့်လင်း၊ အားလုံးပါဝင်၊ ပြည်သူဗဟိုပြု၊ ဂေဟစနစ်နှင့်ကိုက်ညီပြီး အမျိုးမျိုးကွဲပြား၍ ခိုင်မာသော ခေတ်မီအသွင်ပြောင်းမှု အဆင့်မြှင့်တင်ရေးအတွက် ပူးတွဲကြိုးပမ်းအားထုတ်ကြရန် တိုက်တွန်းခဲ့သည်။
လွန်ခဲ့သောနှစ်များအတွင်း တရုတ်-အာဖရိက ပူးပေါင်းဆောင်ရွက်မှုသည် အခြေခံအဆောက်အအုံနှင့် စိုက်ပျိုးရေးကဏ္ဍမှ စက်မှုလုပ်ငန်းအသွင်ပြောင်းခြင်းနှင့် အစိမ်းရောင်စွမ်းအင်ကဏ္ဍအထိ နယ်ပယ်စုံ၌ ဘက်စုံအားကောင်း၍ ကြီးမားသော အလားအလာကို မီးမောင်းထိုးဖော်ပြလျက်ရှိသည်။

တရုတ်နိုင်ငံသည် အာဖရိကတွင် ရထားလမ်း ကီလိုမီတာ ၁၀,၀၀၀ ကျော်၊ လမ်း ကီလိုမီတာ ၁၀၀,၀၀၀ ခန့်၊ တံတား ၁,၀၀၀ စင်းခန့်နှင့် ဆိပ်ကမ်း ၁၀၀ နီးပါး တည်ဆောက်ခြင်းနှင့် အဆင့်မြှင့်ခြင်းပြုလုပ်ခဲ့ကာ အာဖရိကတိုက်ရှိ နိုင်ငံများစွာအတွက် လျှပ်စစ်ဓာတ်အားဖြန့်ဖြူးရေးနှင့် ဆက်သွယ်ရေးကွန်ရက်များကို အဆင့်မြှင့်တင်ပေးခဲ့သည်။
ထို့ပြင် အာဖရိကတိုက်တွင် ဒေသခံပြည်သူများအား တရုတ်နိုင်ငံက စွမ်းရည်နှင့် အသိပညာ လွှဲပြောင်းပေးခြင်းအပါအဝင် အောင်မြင်သော ပူးပေါင်းဆောင်ရွက်မှုများ လုပ်ဆောင်ခဲ့ကြောင်း၊ ယင်းမှာ ဟင်းစားပေးပေးခြင်းထက် ကွန်ချက်ပြခြင်းက ပိုမိုကောင်းမွန်သည်ဟူသော ဆိုရိုးစကားကို ပြည့်စုံစေခြင်းလည်းဖြစ်ပေသည်။

လွန်ခဲ့သော ဆယ်စုနှစ်အတွင်း တရုတ်နိုင်ငံသည် အာဖရိကတိုက်တွင် စိုက်ပျိုးရေးနှင့် နည်းပညာသရုပ်ပြစင်တာများကို တည်‌ဆောက်ခဲ့ပြီး အနာဂတ်၌ ပိုမိုအထောက်အကူပြုနိုင်ရန် အဆင့်မြင့်စိုက်ပျိုးရေးနည်းပညာ အမြောက်အမြားကို မြှင့်တင်ပေးခဲ့သည်။ နည်းပညာအကူအညီများမှတစ်ဆင့် တရုတ်နိုင်ငံက အာဖရိကနိုင်ငံများအား လယ်ယာအထွက်တိုးမှုမြှင့်တင်ပေးခြင်း၊ စိုက်ပျိုးရေးထုတ်ကုန်တန်ဖိုးများ တိုးမြှင့်ခြင်းနှင့် စိုက်ပျိုးရေးခေတ်မီအသွင်ပြောင်းမှု အဆင့်မြှင့်တင်ခြင်းအပေါ် အထောက်အကူပြုနိုင်ခဲ့ရာ ဆင်းရဲနွမ်းပါးမှုလျှော့ချရေးကိုလည်း ပံ့ပိုးကူညီပေးနိုင်ခဲ့သည်။
အာဖရိကတိုက်၏ ကြွယ်ဝသော အရင်းအမြစ်များက စက်မှုအသွင်ပြောင်းခြင်းအတွက် ကြီးမားသောအလားအလာကို ပံ့ပိုးပေးလျက်ရှိသော်လည်း စွမ်းအင်ရှားပါးမှုကမူ အရေးပါသော အတားအဆီးတစ်ခုအဖြစ် ရှိနေပေသည်။ တရုတ်နိုင်ငံက အစိမ်းရောင်နည်းပညာကဏ္ဍတွင် အာဖရိက၏ လိုအပ်ချက်ကို သိနားလည်ခဲ့ရာ ရင်းနှီးမြှုပ်နှံမှုနှင့် နည်းပညာများဖြင့် ယင်းဒေသသို့ ရောက်ရှိလာခဲ့သည်။
တရုတ်နိုင်ငံသည် အာဖရိကတိုက်တွင် ဒေသခံများ၏ လူနေမှုအခြေအနေများ တိုးတက်စေရန်နှင့် စက်မှုလုပ်ငန်းစီးပွားရေးအမျိုးမျိုးထုတ်လုပ်နိုင်ရန် သန့်စင်စွမ်းအင်နှင့် လျှပ်စစ်ဓာတ်အားလိုင်းစီမံကိန်း အမြောက်အမြား ဆောင်ရွက်ပေးခဲ့သည်။ ပြန်လည်ပြည့်ဖြိုးမြဲစွမ်းအင်ကဏ္ဍ၌ တရုတ်-အာဖရိကမိတ်ဖက်ဆက်ဆံရေးသည် အလားအလာများစွာရှိနေသလို နှစ်ဦးနှစ်ဘက် အကျိုးရှိမည့် ရလဒ်များကိုလည်း ပိုမိုဆောင်ကြဉ်းပေးမည်ဖြစ်သည်။
တောင်အာဖရိကနိုင်ငံ သမ္မတ စီရယ်လ် ရာမာဖိုဆာသည် အာဖရိက၏ အခြေခံအဆောက်အအုံနှင့် စွမ်းအင်ကဏ္ဍတွင် တရုတ်နိုင်ငံ၏ ရင်းနှီးမြှုပ်နှံမှုများကို ချီးကျူးပြောကြားခဲ့ကြောင်း၊ တရုတ်နိုင်ငံ၏ ရင်းနှီးမြှုပ်နှံမှုများက စီးပွားရေးပုံစံအမျိုးမျိုးကို မြှင့်တင်ပေးခဲ့ပြီး အလုပ်အကိုင်များဖန်တီးနိုင်ခဲ့ကာ အာဖရိကပေါင်းစည်းရေးကိုလည်း မြှင့်တင်ပေးနိုင်ခဲ့ကြောင်း မှတ်ချက်ပြုခဲ့သည်။

ခေတ်မီအသွင်ပြောင်းမှုသည် နိုင်ငံများအားလုံး၏ ထာဝရအခွင့်အရေးပင်ဖြစ်သည်။ သာတူညီမျှမှုနှင့် အပြန်အလှန်ယုံကြည်မှုပေါ် အခြေတည်ထားသော တရုတ်-အာဖရိက ပူးပေါင်းဆောင်ရွက်မှုသည် ခေတ်မီအသွင်ပြောင်းမှုက အနောက်နိုင်ငံပုံစံသွင်းခြင်းနှင့် အတူတူပင်ဖြစ်သည်ဟူသော စိတ်ကူးယဉ်ပြောဆိုမှုကို ပယ်ဖျက်ခဲ့သလို ဖွံ့ဖြိုးဆဲနိုင်ငံများအတွက် ခေတ်မီအသွင်ပြောင်းမှုရရှိရန် ကျယ်ပြန့်သောလမ်းကြောင်းများလည်း ဖြစ်ပေသည်။
တရုတ်နိုင်ငံနှင့် အာဖရိကတို့သည် နိုင်ငံလွတ်လပ်ရေးအတွက် ယခင်က ကြိုးပမ်းဆောင်ရွက်မှုများ၌ စုစည်းညီညွတ်ခဲ့ကြကာ နိုင်ငံတကာအစီအစဉ်နှင့် ကမ္ဘာလုံးဆိုင်ရာအုပ်ချုပ်ရေးစီမံခန့်ခွဲမှုကို အလေးထားပြီး ဘုံရှုမြင်မှုနှင့် ရည်မှန်းချက်များအား မျှဝေလျက်ရှိသည်။ ဖွံ့ဖြိုးဆဲနိုင်ငံဖြစ်သည့်အားလျော်စွာ တရုတ်နိုင်ငံသည် အာဖရိက၏ ဖိအားအများဆုံးလိုအပ်ချက်များကို နားလည်သဘောပေါက်လျက် ခေတ်မီအသွင်ပြောင်းမှုလမ်းကြောင်းတွင် အာဖရိကတိုက်၏ ယုံကြည်စိတ်ချရသော မိတ်ဖက်နိုင်ငံအဖြစ် အစဉ်အမြဲတည်ရှိနေခဲ့သည်။ ယင်းမှာ တရုတ်နိုင်ငံက အာဖရိကကို ခေတ်သစ်ကိုလိုနီပြုခြင်းမဟုတ်သလို လွှမ်းမိုးခြယ်လှယ်ခြင်းလည်းမဟုတ်ကြောင်း အခိုင်အမာထပ်လောင်းဖော်ပြနေသည်။
ကမ္ဘာလုံးဆိုင်ရာ ခေတ်မီအသွင်ပြောင်းမှုသည် တရုတ်နိုင်ငံနှင့် အာဖရိက၏ ခေတ်မီအသွင်ပြောင်းမှု မပါဝင်ဘဲ မဖြစ်နိုင်ပေ။ ဤခရီးတွင် နီးကပ်၍ တည်ကြည်ခိုင်မာသော မိတ်ဖက်များဖြစ်သည့်အလျောက် တရုတ်နိုင်ငံနှင့် အာဖရိကတို့သည် နိုင်ငံတကာအခင်းအကျင်း မည်သို့ပင်ပြောင်းလဲဖြစ်ပေါ်နေသော်ငြားလည်း နက်ရှိုင်းသောပူးပေါင်းဆောင်ရွက်မှုမှာမူ ဆက်လက်ရှိနေမည်ဖြစ်ပေသည်။ (Xinhua)