သမ္မတ ရှီ အဆိုပြုထားသော မူဝါဒများက တရုတ်နှင့် အာဖရိကကို ပိုမိုနီးကပ်စေမည်

တရုတ်နိုင်ငံ ပေကျင်းမြို့ရှိ ပြည်သူ့ခန်းမဆောင်တွင် တရုတ်ကွန်မြူနစ်ပါတီ ဗဟိုကော်မတီ အထွေထွေအတွင်းရေးမှူးချုပ် ရှီကျင့်ဖိန်ကို ၂၀၂၂ ခုနှစ် အောက်တိုဘာ ၂၃ ရက်က တွေ့ရစဉ် (ဆင်ဟွာ)

ပေကျင်း၊ စက်တင်ဘာ ၃ ရက် (ဆင်ဟွာ)
တရုတ်နိုင်ငံ သမ္မတ ရှီကျင့်ဖိန်၏ စီမံခန့်ခွဲမှုစာအုပ်ပထမတွဲတွင် ပါဝင်သည့် “ယုံကြည်စိတ်ချရသော မိတ်ဆွေများနှင့် ရိုးသားဖြူစင်သည့် မိတ်ဖက်များအဖြစ် ထာဝရရပ်တည်ကြမည်” ဟူသော ခေါင်းစဉ်ဖြင့်ရေးသားထားသော ဆောင်းပါးသည် တရုတ်-အာဖရိက ပူးပေါင်းဆောင်ရွက်မှု၏ အနှစ်သာရကို နားလည်သဘောပေါက်စေရန် မဖြစ်မနေဖတ်ရှုရမည့်လက်ရာတစ်ခုပင်ဖြစ်သည်။
တန်ဇန်းနီးယားနိုင်ငံ ဂျူးလီးယပ်စ်ညီရေးရေး နိုင်ငံတကာကွန်ဗင်းရှင်းစင်တာတွင် ၂၀၁၃ ခုနှစ် မတ် ၂၅ ရက်က ပြောကြားခဲ့သည့် မိန့်ခွန်းဖြစ်သော ထိုဆောင်းပါးတွင် သမ္မတ ရှီက အာဖရိကဆိုင်ရာ တရုတ်နိုင်ငံ၏ မူဝါဒ “ကျန်း ရှီ ချင်း ချိန်” (“zhen shi qin cheng”) ကို ပထမဆုံးအကြိမ် ဖော်ပြခဲ့ခြင်းဖြစ်ရာ ၎င်းတို့၏ အဓိပ္ပါယ်မှာ ရိုးသားခြင်း၊ စစ်မှန်သောအကျိုးကျေးဇူးများ၊ ချစ်ကြည်မှုနှင့် ကောင်းမွန်သော ယုံကြည်အားထားမှု ဟူ၍ဖြစ်သည်။
တရုတ်-အာဖရိကဆက်ဆံရေးသမိုင်းကြောင်း၌ အလွန်အရေးပါလှသောထိုနေ့မှာ နှစ်ပေါင်းများစွာ ကုန်လွန်သွားခဲ့ပြီဖြစ်သော်လည်း အဆိုပါ မူဝါဒမှာမူ တည်တံ့ခိုင်မြဲနေဆဲပင်ဖြစ်သည်။
ထို့ပြင် သမ္မတ ရှီသည် တောင်အာဖရိကနိုင်ငံ ဂျိုဟန်နာဘတ်စ်မြို့တွင် ၂၀၂၃ ခုနှစ် ဩဂုတ်လက ကျင်းပခဲ့သော တရုတ်-အာဖရိကခေါင်းဆောင်များဆွေးနွေးပွဲ၌ တရုတ်နိုင်ငံအနေဖြင့် ထိုမူဝါဒကို အစဉ်အမြဲထိန်းသိမ်းထားလျက်ရှိကြောင်း ပြောကြားလျက် ယင်းမူဝါဒအားဖော်ပြခဲ့ချိန်အခိုက်အတန့်ကို ပြန်ပြောင်းပြောကြားခဲ့သည်။
“လွန်ခဲ့တဲ့ ၁၀ နှစ်တာအတွင်း တရုတ်နိုင်ငံက ဒီမူဝါဒကို ထိန်းသိမ်းလိုက်နာလျက်ပါပဲ။ မိမိတို့အာဖရိကမိတ်ဆွေတွေနဲ့အတူတူ တရုတ်-အာဖရိက ချစ်ကြည်ရင်းနှီးမှုနဲ့ ပူးပေါင်းဆောင်ရွက်မှုစိတ်ဓာတ် ခိုင်မာအားကောင်းရေးလုပ်ဆောင်လျက် စည်းလုံးညီညွတ်မှုနဲ့ ပူးပေါင်းဆောင်ရွက်မှုလမ်းကြောင်းဆီသို့ ဦးတည်သွားခဲ့ကြပြီး ကမ္ဘာကြီးပြောင်းလဲမှုတွေကြားက တရားမျှတမှုအတွက် ရပ်တည်ခဲ့ကြကာ ကိုဗစ်-၁၉ ကပ်ရောဂါကို ရင်ဆိုင်ရာမှာလည်း အချင်းချင်းကြည့်ရှုစောင့်ရှောက်ခဲ့ကြပါတယ်။ မိမိတို့အနေနဲ့ တရုတ်-အာဖရိကဆက်ဆံရေးကို မြင့်မားသောအဆင့်သစ်မြှင့်တင်ခဲ့ကြသလို အဆင့်မြင့်တရုတ်-အာဖရိက အေးအတူပူအမျှ အသိုက်အဝန်းတည်ဆောက်ရေး ပူးတွဲတည်ဆောက်ရေးအဆင့်သစ်ကိုလည်း ဝင်ရောက်လာခဲ့ပြီဖြစ်ပါတယ်” ဟု သမ္မတ ရှီက ပြောခဲ့သည်။
အကယ်စင်စစ် ဤမူဝါဒသည် လွန်ခဲ့သောနှစ်များစွာအတွင်း တရုတ်-အာဖရိကပူးပေါင်းဆောင်ရွက်မှုဖိုရမ် (FOCAC) ကြောင့် အဆင်ပြေချောမွေ့ခဲ့သော ပူးပေါင်းဆောင်ရွက်မှုစီမံကိန်းများစွာတွင် အာဖရိကနှင့် တရုတ်နိုင်ငံ၏ ထိတွေ့ဆက်ဆံမှုကို ပိုမိုခိုင်မာစေခဲ့သည်။
၂၀၁၃ ခုနှစ်တွင် ရှီ တရုတ်နိုင်ငံ သမ္မတဖြစ်လာချိန်မှစ၍ FOCAC သည် ၂၀၁၅ ခုနှစ်၊ ၂၀၁၈ ခုနှစ်နှင့် ၂၀၂၁ ခုနှစ်တို့တွင် အဓိကအစည်းအဝေးပွဲကြီး သုံးခုကို ကြီးမှူးကျင်းပခဲ့သည်။ ယခင် FOCAC သုံးခုတွင် ပြောကြားခဲ့သည့် မိန့်ခွန်းတစ်ခုစီတွင် ရှီက တရုတ်-အာဖရိက ပူးပေါင်းဆောင်ရွက်မှုဆိုင်ရာ မူဝါဒကို အစဉ်အမြဲအလေးထားပြောကြားခဲ့သည်။
FOCAC ပလက်ဖောင်းမှတစ်ဆင့် သမ္မတ ရှီသည် လွန်ခဲ့သောနှစ်များအတွင်း တရုတ်-အာဖရိက ပူးပေါင်းဆောင်ရွက်မှု တိုးချဲ့ရေးနှင့် ချစ်ကြည်ရင်းနှီးမှုနက်ရှိုင်းရေးအတွက် အစီအစဉ်များစွာ ကြေညာခဲ့သည်။
၂၀၁၅ ခုနှစ် FOCAC ဂျိုဟန်နာဘတ်စ်ထိပ်သီးအစည်းအဝေးအတွင်း ရှီသည် အဓိကပူးပေါင်းဆောင်ရွက်မှုစီမံကိန်း ၁၀ ခုကို ကြေညာခဲ့သည်။ ထို့နောက် သုံးနှစ်ကြာပြီးနောက် FOCAC ပေကျင်းထိပ်သီးအစည်းအဝေး၌ အဓိကပူးပေါင်းဆောင်ရွက်မှုစီမံကိန်း ၈ ခုကို ကြေညာခဲ့သည်။ ၂၀၂၁ ခုနှစ်တွင် ဆီနီဂေါနိုင်ငံ၌ ကျင်းပသော ၈ ကြိမ်မြောက် FOCAC ဝန်ကြီးအဆင့်အစည်းအဝေး ဖွင့်ပွဲအခမ်းအနားသို့ သမ္မတ ရှီက ဗီဒီယိုလင့်ခ်မှတစ်ဆင့် မိန့်ခွန်းပြောကြားခဲ့ရာ ပူးပေါင်းဆောင်ရွက်မှုအစီအစဉ် ၉ ခုအား ကြေညာခဲ့သည်။
၂၀၁၃ ခုနှစ်က သမ္မတ ရှီ အဆိုပြုထားသည့် ရပ်ဝန်းနှင့် ပိုးလမ်းမ စီမံကိန်းနှင့် ချိတ်ဆက်ထားသည့် အဆိုပါ ပူးပေါင်းဆောင်ရွက်မှုစီမံကိန်းများသည် အာဖရိကတွင် အခြေခံအဆောက်အအုံနှင့် ကွန်ရက်ချိတ်ဆက်မှုကို မြှင့်တင်ပေးခြင်း စသည့် သိသာထင်ရှားသောအကျိုးရလဒ်များကို ဖြစ်ပေါ်စေခဲ့သည်။
တရုတ်ကုမ္ပဏီများသည် အာဖရိကနိုင်ငံများတွင် ရထားလမ်း ၁၀,၀၀၀ ကီလိုမီတာ ကျော်၊ လမ်း ၁၀၀,၀၀၀ ကီလိုမီတာကျော်၊ တံတား ၁,၀၀၀ ခန့်နှင့် ဆိပ်ကမ်း ၁၀၀ ခန့်၊ လျှပ်စစ်ဓာတ်အားလိုင်းနှင့် ဖြန့်ဖြူးရေးလိုင်း ၆၆,၀၀၀ ကီလိုမီတာ၊ နောက်ခံဆက်သွယ်ရေးကွန်ရက် ၁၅၀,၀၀၀ ကီလိုမီတာ စသည်တို့ တည်ဆောက်ရေး သို့မဟုတ် အဆင့်မြှင့်ရေးတို့တွင် ပါဝင်ဆောင်ရွက်ခဲ့ကြောင်း တရားဝင်အချက်အလက်များ၌ ဖော်ပြထားသည်။
“ကျန်း ရှီ ချင်း ချိန်” မူဝါဒသည် တရုတ်နှင့် အာဖရိကခေါင်းဆောင်များကြား မကြာခဏ အဆင့်မြင့်ကူးလူးဆက်ဆံမှုဖြင့် စံနမူနာပြလျက်ရှိပြီး တရုတ်နိုင်ငံနှင့် အာဖရိကတိုက်ကြား အထူးအလေးထားမှုကိုလည်း ဖော်ညွှန်းလျက်ရှိသည်။ ယမန်နှစ်က တရုတ်-အာဖရိက ခေါင်းဆောင်များအစည်းအဝေးမိန့်ခွန်းတွင် သမ္မတ ရှီက ယင်းမှာ အာဖရိကတိုက်သို့ ၎င်း၏ ဆယ်ကြိမ်မြောက်ခရီးစဉ်ဖြစ်ကြောင်း ထည့်သွင်းပြောကြားခဲ့သည်။
ယခုနှစ်ဆန်းပိုင်းမှစ၍ ဆီရာလီယွန်၊ အန်ဂိုလာ၊ အီကွေတာဂီနီ၊ အီဂျစ်၊ တူနီးရှားနှင့် ဂီနီဘစ်ဆော စသည့် အာဖရိကနိုင်ငံများမှ သမ္မတများအပြင် အာဖရိကနိုင်ငံများစွာမှ နိုင်ငံခြားရေးဝန်ကြီးများလည်း တရုတ်နိုင်ငံသို့ လာရောက်လည်ပတ်ခဲ့ကြသည်။
တရုတ်နိုင်ငံသည် စည်းမျဉ်းများကို ခိုင်မာသောအကျိုးရလဒ်များ ဖော်ဆောင်ပေးသည့် တကယ့်လုပ်ဆောင်ချက်များဖြစ်လာစေရန် ကတိပြုထားသည်။ တရုတ်နိုင်ငံနှင့် ၂၀၂၁ ခုနှစ်တွင် FOCAC ပူးပေါင်းဆောင်ရွက်မှုအစီအစဉ် ၉ ခုအောက်တွင် တရုတ်နိုင်ငံ၏ အကူအညီနှင့် ဖွံ့ဖြိုးတိုးတက်မှုပူးပေါင်းဆောင်ရွက်ရေးလုပ်ငန်းများအားလုံးမှာ လွန်ခဲ့သောသုံးနှစ်တာအတွင်း အမှန်တယ်အကျိုးရှိသောရလဒ်များဖြင့် ပြီးစီးသွားခဲ့ပြီဖြစ်ကြောင်း တရုတ်နိုင်ငံတကာဖွံ့ဖြိုးတိုးတက်မှု ပူးပေါင်းဆောင်ရွက်ရေးအေဂျင်စီက ဖော်ပြထားသည်။
ထို့ပြင် တရုတ်အကူအညီဖြင့် တည်ဆောက်ထားသော အာဖရိက ရောဂါကာကွယ်ထိန်းချုပ်ရေးစင်တာရုံးချုပ် အပါအဝင် ဆေးဝါးနှင့် ကျန်းမာရေးစီမံကိန်းများကို ပစ္စည်းကိရိယာပံ့ပိုးပေးခဲ့သလို ဆင်းရဲနွမ်းပါးမှုလျှော့ချရေးနှင့် စိုက်ပျိုးရေးတိုးတက်မှုစီမံကိန်း ၄၇ ခုကို မာလာဝီ၊ ဘွန်ရွန်ဒီနှင့် ကို့တ်ဒီဗွာ အပါအဝင် အာဖရိကနိုင်ငံများတွင် ဆောင်ရွက်ပြီးစီးခဲ့သည်။
အဆိုပါကာလအတွင်း တရုတ်နိုင်ငံသည် အာဖရိကသို့ စိုက်ပျိုးရေးကျွမ်းကျင်ပညာရှင် ၅၀၀ ကျော်ကိုလည်း စေလွှတ်ခဲ့ပြီး အာဖရိကနိုင်ငံ ၃၀ ကျော်ထံ အရေးပေါ်စားနပ်ရိက္ခာအကူအညီ ယွမ် သန်း ၇၀၀ နီးပါး (အမေရိကန်ဒေါ်လာ သန်း ၁၀၀ ခန့်) ကူညီပံ့ပိုးပေးခဲ့သည်။ (Xinhua)