ကမ္ဘောဒီးယားနိုင်ငံ ဝန်ကြီးချုပ် ဆမ်ဒက် တက်ခ်ချို ဟွန်ဆန်နှင့် ကမ္ဘောဒီးယားသို့ အလည်အပတ်ရောက်ရှိနေသော တရုတ်နိုင်ငံ နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး ဝမ်ရိတို့ ၂၀၂၀ ပြည့်နှစ် အောက်တိုဘာ ၁၂ ရက်က လွတ်လပ်သောကုန်သွယ်ရေးသဘောတူညီချက် လက်မှတ်ရေးထိုးခြင်းအခမ်းအနား တက်ရောက်နေစဉ် (ဆင်ဟွာ)

တရုတ်နိုင်ငံနှင့် ကမ္ဘောဒီးယားနိုင်ငံကြား လွတ်လပ်သောကုန်သွယ်မှုဇုန် (FTA) သည် ၂၀၂၂ ခုနှစ် ဇန်နဝါရီ ၁ ရက်တွင် အသက်ဝင်လာမည်ဖြစ်ကြောင်း စီးပွားရေးဝန်ကြီးဌာန (MOC) အရ သိရသည်။

၂၀၂၀ ပြည့်နှစ် အောက်တိုဘာ ၁၂ ရက်က တရားဝင်လက်မှတ်ရေးထိုးခဲ့သော အဆိုပါ သဘောတူညီချက်သည် တရုတ်နိုင်ငံနှင့် ကမ္ဘောဒီးယားနိုင်ငံကြား ကုန်စည်ကုန်သွယ်မှုများအား စည်းကြပ်ခွန်ကင်းလွတ်ခွင့်အချိုးအစားကို ၉၀ ရာခိုင်နှုန်းကျော်အထိ ဖော်ဆောင်ပေးလျက်ရှိကြောင်း ဝန်ကြီးဌာနက ဆိုသည်။

သဘောတူညီချက်တွင် နှစ်နိုင်ငံတို့သည် ဝန်ဆောင်မှုလုပ်ငန်းကုန်သွယ်ရေးကဏ္ဍ၌ ဖြစ်နိုင်သမျှ တစ်နိုင်ငံနှင့် တစ်နိုင်ငံ ပွင့်လင်းစွာဆောင်ရွက်ရန် သဘောတူခဲ့သည်။

ထို့ပြင် နှစ်နိုင်ငံတို့သည် ရင်းနှီးမြှုပ်နှံမှု၊ ရပ်ဝန်းနှင့် ပိုးလမ်းမ အဆိုပြုချက်၊ e-commerce နှင့် စီးပွားရေးနှင့် နည်းပညာကဏ္ဍများတွင် ပူးပေါင်းဆောင်ရွက်မှု နက်ရှိုင်းရန် သဘောတူခဲ့ကြောင်း MOC အရ သိရသည်။

FTA သည် နှစ်နိုင်ငံ စီးပွားရေးနှင့် ကုန်သွယ်မှုဆက်ဆံရေး ဖွံ့ဖြိုးတိုးတက်မှုတွင် သမိုင်းမှတ်တိုင်အသစ်တစ်ခု ဖြစ်သလို နှစ်နိုင်ငံ စီးပွားရေးလုပ်ငန်းများနှင့် ပြည်သူများ၏ ကြွယ်ဝချမ်းသာမှုအတွက် မြှင့်တင်ရာတွင် အထောက်အကူပြုမည်ဖြစ်ကြောင်း MOC က ဆိုသည်။ (Xinhua)