တရုတ်နိုင်ငံက မလေးရှားနိုင်ငံသို့ နောက်ထပ် Sinovac ကာကွယ်ဆေး အကြိမ်ရေ တစ်သန်းစာ ထပ်မံလှူဒါန်းမည်
2021-11-24 source:ဆင်ဟွာ



တရုတ်နိုင်ငံက မလေးရှားနိုင်ငံသို့ နောက်ထပ် Sinovac ကာကွယ်ဆေး အကြိမ်ရေ တစ်သန်းစာ ထပ်မံလှူဒါန်းသွားမည်ဖြစ်ကြောင်း The Malaysia Reserve အင်တာနက် သတင်းစာမျက်နှာက နိုဝင်ဘာ ၂၃ ရက်တွင် ရေးသားဖော်ပြခဲ့သည်။မလေးရှားနိုင်ငံ နိုင်ငံခြားရေးဝန်ကြီးဌာန ဝန်ကြီး Saifuddin Abdullah က ပြောကြားရာတွင် လက်ရှိအချိန်ထိ တရုတ်နိုင်ငံသည် အရှေ့တောင်အာရှနိုင်ငံများအသင်း(အာဆီယံ)သို့ Sinovac ကာကွယ်ဆေး အကြိမ်ရေ ၂၈ သန်းစာ လှူဒါန်းပေးထားပြီးဖြစ်ကြောင်းနှင့် ယင်းတို့အနက် မလေးရှားနိုင်ငံအတွက် အကြိမ်ရေ ၅၀၀,၀၀၀ စာပါဝင်ခဲ့ကြောင်း ဆိုသည်။


ကာကွယ်ဆေးထောက်ပံ့မှုတွင် ထိပ်ဆုံး၌ ရပ်တည်နေသော တရုတ်နိုင်ငံသည် အာဆီယံအဖွဲ့ဝင် နိုင်ငံများအား ၎င်း၏ အများပြည်သူကျန်းမာရေး နှင့် ဆေးဘက်ဆိုင်ရာစွမ်းဆောင်ရည်များ အတွက် နည်းပညာပိုင်း ၊ အတွေ့အကြုံ နှင့် ဉာဏမူပိုင်ခွင့်များကိုလည်း ထောက်ပံ့ကူညီပေးအပ်သွားမည်ဖြစ်ကြောင်း သတင်းတွင် ဆက်လက်ဖော်ပြထားသည်။


“ ဒါဟာ အာဆီယံကို သူ့ရဲ့ ပြည်သူ့ကျန်းမာရေးစနစ်မြှင့်တင်ဖို့နဲ့ အနာဂတ်ကျန်းမာရေး အရေးပေါ်အခြေအနေတွေအတွက် ကြိုတင်ပြင်ဆင်မှုအပိုင်းတိုးမြှင့်ဖို့ ကူညီဆောင်ရွက်ပေးခြင်းဖြစ်ပါတယ်” ဟု နိုဝင်ဘာ ၂၂ ရက်က အွန်လိုင်းမှတဆင့်ကျင်းပသည့် အာဆီယံ-တရုတ် အထူးထိပ်သီးအစည်းအဝေးအပြီး ပြုလုပ်သော သတင်းစာရှင်းလင်းပွဲတွင် Abdullah က သတင်းထောက်များအားပြောကြားခဲ့သည်။(Xinhua)